SAVF Maatskaplike Werkkantoor waardeer ondersteuning uit gemeenskap
Die SAVF Maatskaplike Werkkantoor lewer al vir 119 jaar dienste aan Middelburg en die omgewing en is daar verlede naweek ’n Moedersdagtee aangebied om hul fondse te versterk.
Motiveringspreker, Andries du Preez, was die gasspreker en was die tema van sy praatjie, ‘Lekkergoed van die Lewe’, oor hoe ’n mens die lewe kan ervaar deur lekker dinge in die lewe te doen.
• Die SAVF Maatskaplike Werkkantoor funksioneer met vier voltydse maatskaplike werkers en een hulpwerker.
Maatskaplike probleme wat hulle aanspreek is: kinderverwaarlosing en -mishandeling, seksuele molestering, verlate kinders, statutêre dienste (optrede in terme van die Kinderwet), materiële nood, berading en mediasie tydens egskeidings.
Om fondse aan te vul, word die Izak Badenhorst-saal (Walter Sisulustraat 52) uitverhuur vir funksies en ander aktiwiteite.
Die huur vir ’n funksie is R3 000 (tafels en stoele ingesluit) plus R1 500 depsito. Die deposito is terugbetaalbaar indien daar geen skade aangemeld is nie.
Persone wat betrokke wil raak by hul projekte, kan me. Jaene Schreuder (Bestuurder, SAVF Maatskaplike Werkkantoor, Middelburg) of Elsie Booysen skakel by 013 282 4413.
• Hul kantoor-ure is Maandae tot Donderdae vanaf 08:00-16:00 en Vrydae tot 13:00.
• Me. Schreuder het gemeld dat hulle die gemeenskap se ondersteuning nodig het om voort te bou op die dienste wat hulle lewer. Sy het ook almal bedank wat steeds hul projekte ondersteun.
