’n Drywer van LR Civils is vanoggend omstreeks 10:00 in Thembisa gekaap toe hy ’n span werkers sou gaan oplaai.

Die werker is aangesê om langs die pad te stop, waar die werkers hom sou kry.

Langs die pad is hy deur ’n man genader wat vir hom gesê het dat hy van ’n taxi-vereniging is, en dat hy nie op die spesifieke plek langs die pad mag stilhou nie.

Die drywer het gevra waar hy mag stop, voordat die persoon wat hom gekonfronteer het, skielik weggestap het.

Daarna is hy oorval deur vier gewapende mans wat die drywer by die bussie in gedwing, en met hom weg gery het.

Voordat die bussie weg gery het, is ’n sak oor sy kop getrek.

Die getraumatiseerde drywer is kort daarna iewers in Soweto afgelaai, vanwaar hy sy werkgewers geskakel het op ’n samaritaan se foon.

Die bussie is steeds weg, en die drywer steeds in Gauteng, waar hy wag om opgelaai te word.

Sy verklaring moet ook nog deur die polisie afgeneem word.

Die maatskappy vra dat persone met inligting die polisie daarvan inlig, sodat die bussie moontlik herwin kan word.

Die drywer is gelukkig nie beseer deur die rowers nie.