Twee dood, verskeie beseer in talle ongelukke oor naweek
Twee persone is dood en verskeie ander mense ernstig beseer in ongelukke wat gedurende die naweek plaasgevind het.
Die Traffic Alert WhatsApp-groep was sedert Vrydag deurentyd bedrywig om motoriste te waarsku oor ernstige ongelukke in en om Middelburg, asook ander paaie in die omgewing.
Vrydag
Omstreeks 21:30 was daar ‘n ongeluk in Lilian Ngoyistraat en ‘n uur later is weer hulp verleen in ‘n ongeluk in Cowen Ntulistraat.
Saterdag
Omstreeks 09:00 het een persoon gesterf en is 10 mense beseer in ‘n ongeluk op die N4 tussen die Alzu Petroport en die Carolina afrit. ‘n Minibus het gerol en het vier ambulanse hulp verleen op die toneel.
Sowat 15 minute later het nog ‘n voertuig nie ver daarvandaan nie, by Wonderfontein gerol.
Om 17:55 is laat weet dat ‘n voertuig die pad verlaat het op die Groblersdal/Middelburgpad (sowat 10km buite Groblersdal). Daar was gelukkig nie ernstige beserings nie.
Om 19:03 was daar ‘n ongeluk met twee voertuie op die hoek van Cowen Ntuli- en Samora Machelstraat.
‘n Uur later is een persoon dood en drie mense ernstig beseer in ‘n ongeluk tussen twee voertuie op die Bethalpad (R35).
Omstreeks middernag was daar weer ‘n ongeluk op die N4 waar ‘n voertuig gerol het. Twee mense, ‘n man en ‘n vrou, was in die kar en het die man ernstige beserings opgedoen.
Sondag
In die vroeë oggendure vandag, om 03:28 is hulp verleen by ‘n ongeluk tussen ‘n trok en ‘n voertuig in Meyerstraat, tussen die Brug- en Beyers Naude afdraaie. Die bestuurder van die Mercedes AMG kan homself gelukkig ag dat hy nie ernstige beserings opgedoen het nie.
Daar is om 08:20 vir dringende hulp op die Traffic Alert-groep gevra na ‘n motorfietsongeluk op die hoek van Cowen Ntuli- en Wesstraat. ‘n Voertuig en ‘n motorfiets het gebots. Daar word verneem dat die motorfietsryer ernstige kopbeserings opgedoen het.
Etlike ure later (11:15) was daar weer ‘n ongeluk, dié keer op die hoek van Walter Sisulu en Beyers Naudestraat en om 16:10 het twee voertuie mekaar getref in John Magagulastraat, naby die Kogelstraatsirkel.
Noodspanne help nou weer
Louwtjie Swart het pas laat weet dat daar op die N11, net na Doornkop, weer ‘n ongeluk was waar ‘n voertuig ‘n trok van agter getref het. Twee insittendes van die voertuig is per ambulans hospitaal toe geneem. Die pad is oop vir verkeer.
Do you have information on a news story you think we should cover?
Please send an email to our News Editor at daleen@mobserver.co.za or phone us on 072 248 3855.
To keep updated and informed on all the latest Middelburg news, visit our official social media pages:
Facebook, Instagram, TikTok, X (Formerly Twitter), and YouTube.
