Middelburg is ‘n armer plek na die heengaan van die hoogs gerespekteerde regspraktisyn, Hein Brauckmann, net na 01:00 vanoggend.
Mnr. Brauckmann is by sy huis oorlede.

Hartversaking blyk die oorsaak van sy dood te wees, sê sy goeie vriend en mede-regspraktisyn, Derick van Wyk.

Van Wyk is vanmore na Brauckmann se huis ontbied deur Brauckmann se vrou, Lizette. Met sy aankoms is dr. Theuns Botha ontbied, maar niks kon verder vir hom gedoen word nie.

Brauckmann het sy loopbaan as prokureur in Middelburg begin, waarna hy hom bekwaam het as advokaat.

Van Wyk het hom beskryf “as een van die slimste mense wat ek bevoorreg was om te ken.” Dit was juis sy optrede, en suksesse in die howe, wat die aandag van justisie ringkoppe getrek het.

Brauckmann het ‘n geruime ruk lank as waarnemende regter in die plaaslike hooggeregshof opgetree.
Hy het egter later besluit om sy loopbaan as advokaat voort te sit.

• Daar kan meer van dié merkwaardige man gelees word in hierdie week se Middelburg Observer.