Selfs die bom-eenheid van Carolina is gister uitgeroep na ’n huis in Aerorand, na ’n oproep vanaf ’n bekommerde inwoner.

“Ek is verstom met die vinnige reaksie vanaf die polisie, die brandweer en die verkeersdepartement! Almal was binne minute hier. Hulle het selfs die bombsquad van Carolina laat weet dat dit ’n moontlike bom kon wees, maar hulle kon darem betyds gekeer word en het hulle omgedraai,” het die inwoner, wat verkies dat sy en die straat waarin hy bly se name weerhou word, gesê.

Hy het omstreeks 16:00 tuisgekom en dadelik gesien dat daar iets nie pluis is op die bure se sypaadjie nie.

“Daar het oop kabels langs mekaar gelê, met putty daaraan vas. Dit het gelyk asof iemand besig was om ’n bom te bou.” Hy het dadelik die polisie geskakel, wat blitsig op die toneel was. Kort daarna het die brandweer en verkeer opgedaag en is die pad toegemaak.

Met nadere ondersoek is gevind dat booswigte kabels uitgetrek het om te steel en dit waarskynlik net so gelos het toe die storm losgebars het. Die man weet nie waarom daar stopverf (putty) aan die drade vas was nie. Hy vermoed dit was om dit bymekaar te hou.