Booswigte het laasnag hul voertuig tot teen ’n muur in Mauserstraat (Dennesig) getrek, waarna ’n dief oor die muur gespring, die motorhuis oopgebreek en twee kinders se fietse gesteel het.

Mishay (12) en MW Stander (8) was vanoggend baie ontsteld toe hulle verneem dat hul fietse gesteel is.

Hul ma, Tammy, sê daar is laasnag in hul motorhuis ingebreek en buiten die fietse, ook elektriese gereedskap gesteel.

Na aanleiding van spore kan daar op die sypaadjie gesien word hoe ’n voertuig tot teen die muur getrek het. Een stel spore wys dat ’n dief daarna oor die muur gespring het. Die motorhuis se slot is gebreek en die deur oopforseer om by die fietse en gereedskap uit te kom.

Wat me. Stander omkrap, “is dat hulle ons moontlik dopgehou het, want hoe het hulle geweet die fietse is in die motorhuis?”

Hulle het die fietse, ’n swart Mongoose Trick fiets en ’n swart fiets, waarop Raleigh in pienk geskryf is, in 2022 vir die kinders gekoop.

As enigiemand die fietse probeer verkwansel, skakel Tammy by 081 511 0193.