Inbrekers het Sondagaand met geweld die staalpenne van ’n muur af weggeruk en ook die elektriese omheining van ’n huis in Gholfsig beskadig.

Een van die inwoners van die huis, wat verkies om anoniem te bly, vertel dat hulle groot skade gely het nadat die diewe toegang verkry het tot ’n buitegebou in die erf.

“Hulle het waarskynlik ’n koevoet gebruik om die staalpenne van die muur af op te lig, en selfs die boute is uit die muur uit losgetrek. Die elektriese heining is ook afgehaal, en op ’n ander gedeelte van die muur het hulle ’n braairooster en ’n stoelkussing gebruik om oor die muur te klim.”

Volgens die inwoner word hierdie metode om toegang tot erwe te kry, meer gereeld in Gholfsig gesien.
“Hulle teiken Gholfsig definitief en dit lyk vir my hulle slaan veral toe op Sondae, omdat hulle drie weke gelede by ’n woonstel ook ingebreek het.”

Daar is gemeld dat daar ook bakstene verwyder is uit die onderste gedeelte van ’n muur, net straataf van hulle.