Een so familie is die Phyffers wat opsoek is na Willem Crous van Koornfontein by Komati kragsentrale, wat sedert verlede jaar Oktober vermis word.

Willem se suster, Amanda Phyffer, vertel dat Willem onder baie verdagte omstandighede saam met twee mans ’n rygeleentheid na Middelburg geneem het.

Willem is tussen 55 en 56, en het by ’n bejaarde vrou ’n woonstel gehuur. Hy het voertuie reg gemaak om ’n inkomste te verdien.

Op die dag van sy verdwyning, het Willem laat weet dat hy Middelburg toe moes gaan om ’n aansluiter te gaan oplaai. Hy het met twee mans by ’n kar ingeklim en is nooit weer van gesien, of van gehoor nie.

“Die werktuigkundige wat saam met Willem gewerk het, het laat weet dat hy nooit die aansluiter opgelaai het nie. Hy het ook vir my gesê dat iets nie reg lyk met sy verdwyning nie,” het Amanda gesê.

Volgens Amanda het hy haar die dag voor sy verdwyning ook gebel om geld te leen, omdat hy ‘in die moeilikheid was’.

Sy landheer het die dag daarna ’n vermiste persone klag by die Koornfontein Polisiestasie gaan aanmeld, maar die familie weet egter steeds nie wat van hom geword het nie.

“Willem het ’n paar jaar gelede ’n hartaanval gehad, en was op kroniese hart en asma medikasies. Sy woonstel is net so agter gelaat, en hy het nie klere of sy medikasie gepak om saam met hom te neem nie. Ons glo nie hy het self die pad gevat nie, anders sou hy sy medikasies saamgevat het. Hy was nie ’n mens wat nie ons ma op Kersdag sou bel nie, en hy het haar nie op Kersdag gebel nie,” sê Amanda.

Indien enige iemand inligting het oor Willem se verdwyning, word hulle gevra om Amanda te kontak by 071 866 4899.

• Die oorskot wat naby die hospitaal gevind is is so erg ontbind dat net beendere oorgebly het. Identifikasie kan net deur DNS toetse bepaal word. Indien iemand glo dat die oorskot aan ’n geliefde behoort, moet hulle by die Middelburg Polisiestasie gaan navrae doen.