‘n Voetganger is doodgery en ‘n vyfjarige kind het beserings opgedoen tydens die impak waartydens die voetganger getref is.

Die voetganger het op die toneel gesterf en die kind is per ambulans hospitaal toe geneem.

Na wat verneem word het die ongeluk omstreeks 12:15 op die N4 tussen die Samora Machel- en Vandyksdrif- afritte gebeur.

Met die slag wat die voetganger getref is, het die Landrover se lugsakke uitgekom en het die kind in die voertuig ‘n gesigbesering opgedoen. Die bestuurder van die voertuig, die vyfjarige kind se pa, het aan erge skok gely en is deur sy pa op die toneel ondersteun.

Talle mense het van oorkant die pad oor die besige snelweg aangehardloop gekom en lank op die toneel bly staan. Twee persone het vir die joernalis gesê dat die oorledene by die Uitkyk informele nedersetting gebly het. Hulle het nie sy naam verskaf nie.