Johan Otten (64) sal onthou word vir die mooi voorbeeld wat hy vir almal gestel het.

Johan is Donderdag in die Life Kosmos Hospitaal oorlede.

Sy seun, Johan (jnr) sê sy pa het middel verlede jaar skielik ’n pyn in sy sy gekry en is daar aanvanklik gedink dat hy dermontsteking het. Na verskeie toetse is hy op 1 Oktober 2024 met ’n rare kanker, genaamd appendiceal adenocarcinoma, ’n tipe blindedermkanker, gediagnoseer. “Dit is ’n baie aggressiewe kanker en daar is nie behandeling daarvoor in Suid-Afrika nie.”

Johan onthou dat sy pa op 31 Januarie hierdie jaar in die hospitaal opgeneem is. “Hy het die dag voor hy opgeneem is nog gewerk. Dit is soos hy was, ’n persoon wat altyd ’n voorbeeld gestel het. Hy was voor die diagnose fisies ’n gesonde man.”

Johan (snr) was vir jare ’n inwoner van Middelburg en was tot met sy afsterwe ’n mynbestuurder by Blue Fountain Beneficiaries (op die Bethalpad).

Dit is egter die besondere band tussen Johan en sy vrou, Susan, wat sy gesin en familie nooit sal vergeet nie. “Hulle was só geheg aan mekaar.” Die egpaar was 42 jaar getroud.

• ’n Gedenkdiens word more (Donderdag) om 11:00 uit die APKerk (hoek van Sipres- en Flamingostraat (Kanonkop) gehou. Persone wat die diens gaan bywoon, word gevra om Soleil te skakel by 082 347 9476.