Aangrypende verhale wat in Middelburg gebeur het tydens die Anglo Boere-oorlog, is vertel tydens ’n spesiale toer deur die dorp.

Volgens Rudi van Wyk, voorsitter van die Middelburg Erfeniskomitee, is die toer gereël deur die Vriende van die Oorlogsmuseum en Middelburg Erfenis.

Die verrigtinge het afgeskop by die gedenksaaltjie by HTS Middelburg, waar Rudi die toergangers verwelkom het. Theo Ligthelm, bestuurslid Middelburg Erfenis en lid van die Vriende van die Oorlogsmuseum, was die aanbieder van die toer.

Vanaf die gedenksaal is die groep na die Middelburg Stasie, waar hulle middagete geniet en deur die Stasiemuseum gestap het.

Tydens die besoek aan die Witkerk is nie net die geskiedenis van die kerk bespreek nie, maar ook die geboue om die kerk.
Interessante staaltjies is vertel oor die eerste landdroskantoor en die huidige landdroskantoor. Laasgenoemde is geleë waar die eerste markplein op die dorp was.

Agter die huidige landdroskantore was die eerste weeshuis wat gestig is deur ds. Alewyn en me. Janie Burger.
In die weeshuis was 45 weeskinders wat in die konsentrasiekamp agtergebly het. Van hulle is later geskuif na die Abram Kriel Kinderhuis in Langlaagte. Burgerspark-woonstelle staan nou waar die weeshuis was.

Die Burgermonument se geskiedenis is gedeel en is daar ook genoem dat Jack Hindon se huis die Blake Gastehuis was, waar Built It nou staan.
Die Witkerk se pastorie was geleë waar Wimpy (oorkant die pad) nou is.

Desjare is die Transvaalse Volkslied gesing as die Middelburgse kommandolede by die treintrokke afgesien is. Nadat Theo dié geskiedenisbrokkie gedeel het, het Thelma Steyn op die Witkerk se orrel die lied gespeel.
Sy het ook die komponis, Händel, se dodemars gespeel toe daar gepraat is oor die talle Middelburgers wat tydens die oorlog in Natal doodgeskiet is.

Die ou begraafplaas in Gholfsig is verder besoek, waar daar stilgestaan is by bekendes se grafte, soos dié van John Blake (Amerikaner wat Suid-Afrika toe gekom het).
Phillipus Rudolph Botha is ook daar begrawe. Hy het op 79-jarige ouderdom weens ontbering in die konsentrasiekamp gesterf.

Ander grafte wat besoek is, is dié van ds. en me. Burger, Jack Hindon, Henry Slegtkamp en Thomas Begbie.

• Buiten skyfievertonings wat gebruik is tydens die praatjies, was daar ook ’n uitstalling met foto’s van kapt. Jack Hindon, Henry Slegtkamp, die Burger leraarspaar en die konsentrasiekampterrein waar die gedenksaaltjie nou staan.
• ’n Foto van oudlanddros Jan Engelbrecht het deel van die uitstalling uitgemaak. Hy was een van die stigterslede van Middelburg Erfenis. ‘Oom Jan’, soos hy deur almal onthou word, is op 1 Maart vanjaar oorlede.