Angelique van Kraayenburg (40) baklei al langer as ’n jaar teen ’n verwoestende, ongediagnoseerde mediese toestand.

Haar gesondheid het die afgelope paar weke só drasties versleg dat haar familie verlede week deur die hospitaal gekontak is om haar, “te kom groet.”

Angelique word tans in die intensiewesorgeenheid van die Steve Biko Akademiese Hospitaal behandel, waar dokters onverpoos toetse doen om vas te stel wat haar so siek maak. Die eens lewenslustige vrou wat by Ismails Furnitures in Eastdene gewerk het, weeg ’n skamele 39kg. Sy is verlede week opgeneem in die hospitaal waar sy aan ’n ventilator gekoppel was en afgehaal is, maar weer ’n terugslag beleef het.

Volgens haar verloofde, Pieter Smit, het dokters vanoggend bevestig dat Angelique ’n ernstige infeksie in haar regterlong het en sukkel om asem te kry. Sy loop ook gevaar vir interne bloeding en is weer teruggeplaas op die ventilator.

In die laaste week het haar hart twee keer gaan staan en is noodbehandeling toegepas. Die kostes op die gesin om haar die hele tyd te ondersteun, raak elke dag meer. Omdat haar gesondheid so agteruit gegaan het, moes Angelique haar werk bedank.

Pieter pendel daagliks tussen Middelburg en Pretoria om aan haar sy te wees, wat ’n emosionele én finansiële tol eis. Die kostes vir vervoer en ekstra kostes vir al die toetse maak dit bitter moeilik vir haar familie.

BackaBuddy begin om te help

Uit pure nood het Claudia Atkins ’n BackaBuddy-veldtog geloods om die gesin se finansiële laste te help dra. Elke bydrae, hoe klein ook al, sal help om:

• mediese uitgawes te dek.

• reis- en vervoerkoste te dra.

• die gesin staande te hou terwyl Angelique veg vir haar lewe.

Kliek op die volgende skakel om ’n bydrae op die BackaBuddy-blad te maak:

https://www.backabuddy.co.za/campaign/help-angelique-get-better