‘n Welbekende oud-polisieman is gister in die Wes-Kaap gearresteer op ten minste nege seksuele aanrandingsklagtes, wat onder andere verkragting insluit.

Die polisieman, wie se naam bekend is, maar wie nie op hierdie stadium geïdentifiseer mag word nie, is, luidens ‘n verklaring deur kapt. Frederick van Wyk, die Wes-Kaapse provinsiale woordvoerder, by sy blyplek in Table View gearresteer.

Deur die jare het verskeie vroue bewerings teen die polisieman gemaak.

Van die klagtes dateer sover terug as 2002 en van die klaers was so jonk as 15 jaar oud.

Hy is gearresteer op lasbriewe wat uitgereik is ten opsigte van sake wat geopen is in onder andere Middelburg, Secunda en Nelspruit.

Die ondersoekbeampte van Mpumalanga het die Wes Kaapse polisie in kennis gestel waar die oud-polisieman hom bevind en hulle het hom gaan gearresteer.

• Die polisieman bly tans in aanhouding en sal die ondersoekbeampte hom in die Wes Kaap gaan haal en vervoer na Middelburg waar hy volgende week in die streekhof sal verskyn.
• Behalwe vir die genoemde klagtes, was hy ook in ’n omstrede voorval betrokke waar ’n vrou gesterf het. Die omstandighede kan nie nou openbaar gemaak word nie omdat dit hom kan identifiseer.