Die oudpolisieman wat in November verlede jaar gearresteer is en teregstaan op verskeie klagtes wat verband hou met seksdade, sal vandag weer aansoek doen vir borg.

Die man, wie se naam nie genoem word nie, omdat hy nog nie gepleit het nie, is in die Kaap gearresteer en het vlugtig daar in die hof verskyn. Vandaar is hy vervoer na Middelburg waar hy aansoek gedoen het vir borg.

Adv. Derik Rowles het die ondersoekbeampte se redes voorgelees waarom die oudpolisieman nie moet borg kry nie, waaronder die ernstige aard van die klagtes wat onder andere verkragting en poging tot verkragting insluit.

Daar is onder meer gesê dat hy sy mag as polisieman misbruik het om die vrouens uit te lok om saam met hom te ry. Verder is daar ook beweer dat hy hulle bedwelm het deur vir hulle ’n pilletjie te gee of een of ander middel in hul drankies te gooi, waarop hulle hul bewussyn verloor het.