’n Skitterede wedstryd in die NWU Pukke halfeindstryd tussen EG Jansen en HTS Middelburg se eerste spanne, is ontsier deur onnodige geniepsige spel van die Boksburgers.

Albei die Rooi Bulle senters, Nathan Jansen van Vuuren en Jacques Greyling, is hospitaal toe geneem.

Daar is verneem dat hulle tans by die Life Midmed Hospitaal se Ongevalle afdeling is.

Jansen van Vuuren het ’n nekbesering opgedoen en is met ’n ambulans hospitaal toe afgevoer.

Die EG Jansen speler wat hom by ’n losskrum vanuit ’n onkant posisie geloop het, terwyl hy weerloos was, is met ’n rooi kaart van die veld gestuur.

Greyling het opgestaan na hy behandel is en om die veld na sy span gestap,  maar het nadat die eindfluitjie geblaas het, inmekaar gesak.

Hy was duidelik in groot pyn en het vermoedelik ’n ribbesering opgedoen.

Die senterpaar was die span se groot helde en het skitter spel opgedis voordat hulle beseer is.

Die voorvalle is bejammeringswaardig omdat toeskouers vermaak is met ’n drieëfees. Die Rooi Bulle het nooit gelyk of hulle gaan verloor nie en het by tye mooi rugby gespeel om met 46-31 te wen.

Hoërskool Middelburg het met 40 elk teen Ben Vorster van Tzaneen gelykop gespeel, maar dring deur na die eindstryde volgende naweek teen HTS Middelburg op die velde van Hoërskool Kempton Park, omdat hulle die eerste drie van die wedstryd en ook die meeste drieë gedruk het.

Dit kan ’n kleedrepetisie wees vir die groot derby later hierdie jaar.