Die meeste mense ken hom as “Herman van Socrates”.
Na dese kan hy bekend staan as “Herman Ysterman”.
Ses dae nadat Herman van Niekerk (43) die Isuzu Ysterman Suid-Afrikaanse kampioenskappe voltooi het, het hy Saterdag ook die Loskop 50km kafgedraf.
Om net te dink aan sy ses dae se malligheid maak mens moeg.

Verlede Sondag het hy drie kilometer in die see geswem, 180 kilometer fiets gery en daarna ’n marathon gehardloop, 42,2 kilometer. ’n Totale afstand van 226 kilometer!
Moenie die man op sy bande, skuus baadjie, takseer nie.
Saterdagoggend het hy saam met netbal skeidsregter, Tharina Opperman, die Loskop 50km ultra-marathon met ’n groot glimlag klaargemaak.

Hulle is albei aktiewe lede van die Hervormde Noord Gemeente.
Sondagoggend was Tharina vars en vrolik in die kerk om die voorsang te lei en die afkondigings te doen.
Wanneer jy Herman pols oor sy epiese poging, maak hy dit af as nikseggend. “Jy is nie so seer as na Comrades wanneer jy die Ysterman klaargemaak het nie, daarom is dit dit nie so erg om die Loskop ook te doen nie”.

Shaun Bekker, wat ook die Ysterman se baas was, het die Wild Challenge kafgedraf.
Asof dit nie genoeg is nie, het Socrates ook Saterdagoggend ’n waterpunt op die Loskop Marathon beman!