Phillip (Flippie) du Plessis was nooit Laerskool Middelburg se eerstespan gelukbringer nie.

Maar Flippie se hart het gebrand om betrokke te wees.

Wanneer die eerstespan op die veld draf, het hy met verlangende oë gestaar.

Flippie met sy kort beentjies.

Maar toe speel die Koedoekoppe verlede week teen Middelburg Primary.

Flippie wou graag die span se gelukbringer wees, maar hy het geweet die ligawedstryd is ernstige sake.

Wat sou “Meneer” sê?

Die span se losskakel, Nicus van der Merwe, het Flippie aangemoedig om voor te draf.

Die enigste probleem was ’n broek.

Waar kry jy so vinnig ’n broek wat pas?

Die enigste witbroek wat geleen kon word was heeltemal te groot vir Flippie.

Wannneer jy jou skool se eerstespan gelukbringer wil wees keer niks jou nie.
En daar draf Flippie op die veld met ’n kort-langbroek.

“Meneer” het die seuns laat begaan; en net daar is ’n gelukbringer gebore; Phillip du Plessis, Laerskool Middelburg se amptelike eerstespan gelukbringer.

Dinsdag tydens die wedstryd teen Laerskool Kanonkop het Flippie voor gedraf met ’n glimlag so groot soos daai broek.

Hy het pure hanswors wawiele gemaak en rustyd grootoog in die kringetjie na Meneer Darius (Botha) geluister.

Wanneer Nicus van der Merwe pale toe aangelê het, het sy kort beentjies vinnig met die skopkelkie opgehardloop.

Natuurlik het grootbroek Flippie, nou ’n nuwe broek…

Een wat pas.