Woede nadat op speler geduik is in doelgebied
Video op sosiale media laat die tonge klap
Terwyl sommige ouers van Dr EG Jansen van Boksburg spog dat hulle op die gevegsfront beter is as die hokvegter, Dricus du Plessis, is daar woede onder ander ouers. ’n Video wat tans op sosiale media versprei word het die pot laat oorkook.
Dit wys hoe daar op ’n speler van Hoërskool Middelburg geduik word nadat hy ’n drie gedruk het.
Die video eindig met die Hoërskool Middelburg speler wat op die grond krul van die pyn.
Tydens die wedstryd teen HTS Middelburg het een van die Dr EG Jansen spelers ’n rooi kaart gekry, nadat die senter, Nathan Jansen van Vuuren, by ’n losskrum so erg geloop is, dat hy met ’n draagbaar van die veld gehelp en met ’n ambulans hospitaal toe gehaas is.
Sy sentermaat, Jacques Greyling, is so geduik dat sy milt geskeur het.
’n Geneesheer het later gesê die besering was so gewelddadig dat dit met ’n karongeluk vergelyk kan word.
Hoërskool Middelburg rugbyhoof, Christiaan Gouws, het gesê omdat die skuldige speler in die doellyn voorval nie ’n kaart gekry het nie, kan hulle nie verder optree nie.
“Ons kinders se veiliheid is belangrik vir ons. Daar was geen kaart nie so ons kan nie appeleer nie.”
