“Ek is soos ’n seuntjie in ’n speelgoedwinkel.”
Die voorsitter van Middelburg Erfenisvereniging, Rudi van Wyk, gaan delf gereeld in die Middelburg Observer se argiewe.
Die eerste uitgawe het in 1903 verskyn, 123 jaar gelede.
Hy raak so opgewonde soos ’n klein seutjie wanneer hy op nog ’n interessantheid afkom.

Begin krap in ander koerante

“Ek gaan gewoonlik argiewe toe om inligting oor ons dorp se geskiedenis te bekom. In die meeste van die gevalle kry ek waarna ek gesoek het, maar dan raak ek soos ’n seuntjie in ’n speelgoedwinkel en begin krap in ander koerante. Die een ding lei tot die ander!” vertel hy.
“Die gedrukte koerant is darem net baie lekkerder as die elektroniese koerante.
“Dit was sommer hoendervleis lekker om een van die eerste uitgawes van die Middelburg Observer te kon vashou en deur te blaai.”

Hy sê die argiewe is ’n ongelooflike bron van inligting oor ons dorp se geskiedenis, skole se ontstaan en groei, die ontwikkeling en groei van sport en gesondheidsorg in die dorp en feeste wat jare gelede gehou is.

Dorp se heel eerste vroulike polisielede

“Behalwe geskiedenis artikels lê die geskiedenis van ons dorp se polisie en fietsry my na aan die hart. Ek het onlangs op ’n interessante artikel, gepubliseer in 1974 afgekom, oor ons dorp se heel eerste vroulike polisielede en dan natuurlik oor geadverteerde fietswedrenne van vroeg in die 1900’s.”