Die Springbok legende, Frik du Preez, het na die 1969 Curriebeker eindstryd teen die Westelike Provinsie, gesê hy het “gedrop, gescore en geplace”.
Dit was nadat hy ’n skepdoel oorgesit het, ’n drie gedruk en boonop ’n stelskop oorgeklits het.
Maar hoe’s hierdie vir jou Oom Frik?
Flippie du Plessis het gewawiel, geballboy en toe geplace.
Ou Frik sou mos nooit soos Flippie kon wawiele doen nie?
Flippie doen ’n wawiel toe hy op die veld draf. FOTO: Tobie van den Bergh.
Philip du Plessis, Flippie vir sy spanmaats, is Laerskool Middelburg se eerstespan gelukbringer.
In ’n ligawedstryd teen Middelburg Primary het hy en die eerstespan kaptein, Nicus van der Merwe, saamgespan.
’n Wit broek, heeltemal te groot vir Flippie se kort beentjies, is gereël en onder Nicus se aanmoediging het hy die eerste keer voor gedraf as die span se gelukbringer.
’n Week later teen Laerskool Kanonkop was Flippie so tuis soos ’n nar in ’n sirkustent in sy nuwe rol.
Hy het sommer ook met ’n paar wilde wawiele laat waai.
Tydens die Mpumalanga uitspeelwedstryde Vrydag was daar ’n brandende begeerte in Flippie se oë.
Hy het kliphard saam met die eerstespan opgewarm, weer, voor gedraf en sy wawiele gedoen.
Nie goed genoeg vir ’n man wat so hard opgewarm het nie.
Al het hy ook die skopkelkie vir sy kaptein, Nicus van der Merwe, opgevat wanneer hy skop, was daar ’n verlange in Flippie se oë.
Hy wou speel!
In die uitspeelwedstryd vir derde en vierdie plek vandag teen Klipfontein het Flippie sy kans gekry.
Hy is opgestuur en het selfs die bal ’n slag hanteer.
En toe kom sy groot kans.
Hy kon pale toe skop.
Die bal is gestel.
Soos Naas Botha het hy gevat-vat om seker te maak die bal is reggestel, teruggetreë, weer vorentoe gestap, met lang hale teruggestap, sy broek opgetrek en vorentoe gestorm vir die skop van sy lewe…
Die skop was mis.
Maar Flippie het hom tot binne die harte van almal wat daar was geskop.
Toe sy spanmaats hom omhels het sy trane geloop.
En op die pawiljoene was daar nie ’n droë oog nie…
