KYK: Laerskool Middelburg is goud, pure goud
Twee goud, een silwer en een brons vir die Koedoekoppe.
Laerskool Middelburg het een van sy grootste hoogtepunte in sy meer as 120 jaar bestaan beleef, toe twee van die skool se rugbyspanne as Mpumalanga kampioene gekroon is.
Die o/10 span het goud gewen met ’n 17-10 oorwinning oor Laerskool Staatspresident CR Swart.
Die o/11 span het in ’n klipharde kragmeting teen Bergland met 7-0 gewen.
Boonop het die o/9 span die silwer medalje ingepalm, naday hy met 5-17 teen Nelspruit in die eindstryd vasgeval het.
Die eerstespan het na sy nederlaag teen die eintlike kampioene, Goedehoop, vergoed deur Klipfontein met 22-7 te klop.
Goedehoop het Nelspruit se eerstespan in die eindstryd van die grootskole geklop.
Die hoof van Laerskool Middelburg, mnr. Gerrie van der Merwe, het gesê “dit was twee groot dae vir die skool. Ons is nederig dankbaar.”
Die uitspeelwedstryde het gister by Hoërskool Middelburg plaasgevind en die eindstryde vandag.
