Wie is Floris Cornelius Smit?
Die eensame graf in die heldeakker in die Gholfsig-begraafplaas.
Daar tussen ANC kaders lê hy begrawe.
Nie soos ander grensoorlog helde Rudi Marx en Fly Lombaard wat in die Verdoornstraat-begraafplaas begrawe is nie.

Met die jeugdavieringe wou die Steve Tshwete Munisipaliteit Smit se familie uitnooi.
Maar daar is geen inligting oor hom en sy familie nie.
Net die graf waarop daar staan “vir ons die goeie herinnering sterf jy in troue ootmoet. Ons vir jou Suid-Afrika”.
Bokant sy naam is die woorde “ons geliefde seun en broer”.

Hy is op 11 Desember 1962 gebore en oorlede op 24 Augustus 1981.
Daar is vele vrae.
Waar het Floris Cornelius gesterf?
Wat was die omstandighede?
In watter skool was hy?
Wie is sy familie?
Onbeantwoorde vrae.

Theo Ligthelm en Tian Schutte skryf hierdie week in die rubriek oor Middelburg se geskiedenis oor Gert Roets, die 13-jarige krysgevangene: “Na twee maande se lyding sterf Gerhardus Jacobus Roets op 15 Maart 1907. Hy is waarskynlik op die plaas, wat nou ’n myn-area is, begrawe, maar die graf kon nie opgespoor word nie. ’n Tragiese einde vir ’n jong seun op ’n foto, wat die oorlog en krygsgevangenskap oorleef het, om so te sterf.”
Geen graf nie, net herinneringe.

Die Middelburg Erfenisvereniging voorsitter, Rudi van Wyk, het lank gesoek na die graf van Natie du Toit. Die vrou wat met varkore troos gebring het in konsentrasiekampe. Hy het die graf op ’n plaas opgespoor.
“Natie sterf op 25 September 1945 in die Lady Dudley Verpleeginrigting in Johannesburg aan kanker. Sy word langs haar seun, Gerrie, op die plaas Blesbokvlakte ter ruste gelê.”

Maar wat is die storie van Floris Smit se graf?
Van Wyk sê die erfenisvereniging het ook geen inligting oor Smit nie.
Wie weet?
Wie weet wie was Floris Smit?
Laat weet asseblief vir Tobie van den Bergh by 072 220 1568.