Vrydag, 19 Junie, was alles behalwe ’n gewone dag by die DBV.

Waar die personeel gewoonlik hul tyd aan die versorging van honde en katte wy, het verfkwaste, hamers en ’n span toegewyde vrywilligers dié keer die toon aangegee.

Die Middelburg en omliggende gemeenskap het saamgespan om geriewe by die DBV, ’n broodnodige opknapping te gee en terselfdertyd die organisasie se viervoet-inwoners behoorlik te bederf.

Teen sononder was die verandering sigbaar. Varsgeverfde mure, splinternuwe teëls, nuwe kaste en wasbakke het die geriewe ’n nuwe baadjie gegee, terwyl ’n sterk gevoel van gemeenskapsgees die dag afgerond het.

Volgens die DBV was dit veel meer as net nóg ’n Vrydag. “Die harte van omgee en gewilligheid van ons gemeenskap maak werklik ’n verskil.”

Die projek is deur Marie-Loe Scheppel en span gedryf, wat ondernemings en ondersteuners bymekaar gekry het om die personeel én die diere in hul sorg met ’n welverdiende opknappings te verras.

Kantore, kombuis en badkamers se verouderde vloere is met nuwe teëls vervang, die mure het ’n vars laag verf gekry, die kassies, wasbakke en rakke is ook verruil vir nuwes.

Die diere het nie met leë pote weggestap nie. Meer as 70 nuwe hondebeddens, sagte komberse, katkos en ander benodigdhede is geskenk.

Terwyl die opknappings aan die gang was, is die talle helpers deur die dag met kos en verversings bederf.

Plaaslike ondernemings het die projek ondersteun deur om alles vir die dag insluitend teëls, wasbakke, kombuiskaste, verf, hardeware, hondebeddens, komberse en katkos en vele meer te verskaf.

Lees meer en sien die resultaat van die Middelburg-DBV se opknappings in die volgende uitgawe van die Middelburg Observer.