Eers was daar Koekoe, Duif, Kiet en Kees, in die “Sus en Daan”-reeks wat kinders jare gelede leer lees het.

Nou is daar Willie, Bollie, Bismarck en Penny.

Maar anders as Kiet en Kees, wat kinders leer lees het, vermaak Willie en Bollie Kranspoort dorp se inwoners met hulle streke.

Of is dit nou met hulle varkemanewales?

Hulle koedoekaskenades?

Of die duifdans?

Elkeen het sy eie unieke storie.Willie en Bollie is twee vlakvarke, Bismarck ’n duif en Penny ’n koedoe.

Penny se ma is by geboorte dood.

Dit is al 11 jaar gelede.

Willie en Riana Schoeman het die koedoetjie onder hulle vlerk geneem en soos ’n baba vertroetel, tot sy groot was.

Sedertdien is Penny pure mens.

Jimbo Gordon van Pumba’s Den het sy Sondagmiddagslapie geniet, toe hy wakker word met Penny se lang ore hier by sy gesig.

Sy wag nie vir ’n uitnodiging nie en stap ewe kordaat by Pumba’s Den in vir ’n peuselhappie.

Noleene Gordon het geen probleem om haar huis met die vreemde vrou te deel nie.

Om die waarheid te sê, die twee gesels al soos ou vriendinne.

Penny is al self ’n ma van 10.

Maar soos in die Sus en Daan-reeks is daar nie net een storie nie.

Om meer te lees van Willie en Bollie se manewales hou die Middelburg Observer se webblad dop.