Na sy 43-29 nederlaag gister teen Griekwas, speel die Puma Cravenweekspan more (Donderdag) teen die Grens, wat met 36-14 teen die Valke gewen het. Grens se pak het die kragmeting gedomineer en die Pumas kan hulle staal vir nog ’n moeilike dag in Gqeberha.

Kras geel kaarte uitgedeel

Afrigter Coene Nolte sal hoop hulle het ’n skeidsregter wat beter blaas, nadat hulle teen die Diamantvelders die hele tyd aan die verkeerde kant was met kras geel kaarte wat uitgedeel is. Hy sal egter ook beter dissipline van die Pumas verwag.

Nadat Nolte met sy plaasvervangers begin het, sal die sterkste moontlike span more teen die Grens opdraf.
Daar is darem ’n stukkie sonskyn vir vanjaar se span met byna die helfte van die spelers wat weer volgende jaar beskikbaar gaan wees.

Nolte verhuis

Nolte verhuis egter na Limpopo om by Hoërskool Ben Viljoen aan te sluit en ’n nuwe afrigter sal later die jaar aangewys word.

Die Valke en Griffons speel more in die eerste wedstryd, die Bulle pak Griekwas en die Leeus speel teen die Westelike Provinsie vyftiental.