’n Graad 11 leerling van Hoërskool Middelburg, Herman Grobler (17), het Saterdag die Vrouedag-fietswedren by Rooiwal gewen.
Grobler en Jono Lyndon was in ’n hewige tweestryd betrokke en het mekaar tot by die wenstreep opgedreun.
Hulle het vroeg weggebreek en is in ’n naelrit oor die wenstreep, albei in ’n tyd van 1:19:17. Alhoewel Lyndon eerste geplaas is op die amptelike uitslae vir die 50km het die podiumplek aan die Middelburger gegaan.
Hy het na die tyd gesê dit is ’n harde wedren met een lang klim wat jou toets.
Eintlik was dit nie ’n Vrouedag-wedren nie, maar Groblerdag, want Herman se ma, Maritza, het ook die 50km voltooi, terwyl sy niggie, Zane Engelbrecht, tweede was in die vroue afdeling, wat deur Karien Goosen van Tukkies gewen is.
Lu-Mari du Plessis van Secunda was eerste in die 95km vir vroue 17-18.
Daar was 140 inskrywings vir die 50km.
Stian Landsberg het die 95km gewen in ’n tyd van 2;12;42, met Henro van der Walt tweede in 2:12;43, gevolg deur Ruan England, Herman Fouche, Kyle Mitchell, Henke Lombard, Travis Rademan-Ludeke, Quintin Knoetze, Henk Venter, Marius Coutard en Ethan Stewart.
’n Groot veld van 231 fietsryers het deelgeneem aan die langer afstand.
Die wedren is puik aangebied.
