Hoërskool Middelburg het Woensdagaand nuwe spreiligte by sy krieketveld met groot fanfare ingewy.
’n Protea krieketspeler het ’n krieketkliniek aangebied, daar was ’n lewendige orkes, die oorhandiging van ’n unieke klok én kort toesprake. Al wat gekort het was rook wat blaas.

Dit is ’n droom wat al sedert 2020 gekoester is.
Die ligte is die enigste van sy soort in Suid-Afrika .
Jong krieketspelers het hulle vergaap aan Protea krieketspeler Rassie van der Dussen wat ’n krieketkliniek aangebied het.

Van der Dussen het ’n paar krieketwenke gegee en gewys waarom hy vir die Proteas speel.
Hy het ’n paar balle trotseer en daar is na die hemele gestaar, toe hy ’n reuse houe gespeel het, wat die bal vanaf die kolfblad tot by die skool se hokkieveld laat trek het.

Voordat die ligte aangeskakel is, het die hoof van Hoërskool Middelburg, mnr. JJ Hennop, gesê die fasiliteite word geskep tot voordeel van die leerlinge.
Hoërskool Middelburg beskik oor van die beste krieketfasiliteite in die land met onderdak oefenfasiliteite en ’n netjiese klubhuis.

Die spreiligte gaan ’n reuse inspuiting wees vir die skool se krieket, wat alreeds sy man staan teen die beste van die beste. Die geleentheid is ook bygewoon deur die oud skoolhoof, mnr. Johan Stronkhorst. Die musiek van Drommedaris het die aand afgeskop.