Die lewe van die geliefde onderwyser van HTS Witbank, Pikkie Herrmann, word op 27 Augustus, om 14:00, in die skoolsaal gevier. Die diens sal deur ds Louis Cloete waargeneem word en word afgesluit met ’n klokluiseremonie.

Mnr. Herrmann is Saterdag aan ’n hartaanval oorlede.
Hy het diep spore getrap by Laerskool Duvhapark, Laerskool Middelburg, HTS Middelburg en die laaste paar jaar by HTS Witbank.

Laerskool Middelburg was een van die talle skole wat ’n huldeblyk oor mnr. Herrmann geplaas het.
Die skool sê: “Ons hartseer is diep, ons verlies is groot.”

Die skool sê mnr. Herrmann was veel meer as ’n kollega. “Hy was ’n gewaardeerde deel van die Koedoekoppe-familie en het oor baie jare ’n onuitwisbare merk op ons skool en op die mense rondom hom gelaat”.

Mnr. Herrmann het as hoof waargeneem by Laerskool Middelburg en was ook een van die adjunkhoofde.
“Sommige mense stap net deur ’n mens se lewe. Ander laat voetspore agter wat nooit verdwyn nie. Pikkie het diep spore getrap in ons skool, in die harte van personeel en leerders, en in die groter Koedoekop-gemeenskap.”