Draf vir Ouma en Oupa – en as jy nie kan draf nie, trap dan!
Die regering sny subsidies, die lewenskoste skiet die hoogte in en om die begroting van ouetehuise te laat klop, is hul hoop gevestig op dié wat nog sonder ’n kierie of rolstoel oor die weg kan kom.
Die St. Joseph’s Tehuis vir Bejaardes doen ’n beroep op drawwers en stappers om vanaand (2 September) hul tekkies aan te trek en Ouma en Oupa te ondersteun.
’n 10 km-wedloop en 5 km-pretloop word vanaf die Hervormde Noord-gemeente in Kanonkop aangebied, met die wegspring om 18:30.
Inskrywing kos R100 vir die 10 km en R50 vir die 5 km. Die tehuis nooi deelnemers met die volgende boodskap: “Trek daardie tekkies aan en spring weg in ’n opwindende nagwedloop. Hardloop vir Ouma en Oupa! Nie net kan jy ’n kontantprys wen nie, maar elke deelnemer sal skitter met ’n medalje, terwyl jy St. Joseph’s Tehuis vir Bejaardes ondersteun. Moenie hierdie kans misloop om ’n verskil te maak in ons geliefde bejaardes se lewens nie!”
Vir navrae, skakel Paul Bester by 082 966 7767.
• En as jy nou nie kan draf om vir Ouma en Oupa te help nie, kan jy fietsry.
Op 10 Oktober word die Kragtrap-bergfietswedrenne aangebied ten bate van die Carolina SAVF Tehuis.
Die wedrenne word by Suikerboschfontein gehou met afstande oor 10 km, 30 km en 55 km.
Vir navrae, skakel 079 629 3753.
