Hoërskool Middelburg se matrikulante van 1976 gedenk dié naweek hul halfeeu-reünie met ’n spesiale byeenkoms op Vrydag, 4 September en Saterdag, 5 September by die Middies-klub in Middelburg.

Die gekuier skop Vrydag om 15:00 af. Gaste kan uitsien na vetkoek met maalvleis en plaaskonfyt, terwyl Wim Booyse vir die musiek sal sorg.

Naweek van nostalgie

Saterdag se program begin om 10:00 met die amptelike verwelkoming. Om 10:30 volg ’n toer deur die skool en koshuise, waar kospakkies ook voorsien sal word.

Die braaivure word om 12:00 aangesteek, waarna smullekker braaipakkies en bykosse voorgesit sal word. Organiseerders het bevestig dat gratis koffie en tee beskikbaar sal wees, asook ’n kontantkroeg vir diegene wat die keel wil natmaak.

Dié oudklasmaats se samekoms beloof om een vir die boeke te wees.

’n Naweek propvol ou verhale, bekende gesigte en kosbare herinneringe aan skooldae wat dekades later steeds ’n spesiale plek in almal se harte dra.