Om en om, en om, en om…
Raak jy duiselig? Ek ook!

Stel jou voor: 70 rondtes om die Red Star-renbaan se vier kilometer – ’n allemintige 278 km.
Dit is syfers wat selfs die grootste rusbanksportentoesias moeg sal maak.

Dit is presies wat Middelburg Fietsryklub se Corné Ferreira Saterdag tydens die Trap de Star reggekry het. Die wedren het Saterdagaand om 18:00 begin en Sondagoggend om 06:00 geëindig.

Altesaam 13 fietsryers het 549 rondtes om die baan voltooi, vir ’n gesamentlike afstand van 2 132 km.
Corné het die sesde meeste rondtes voltooi. Ralph Cope het 331 km afgelê, gevolg deur Mark Coetzee met 323 km, Willem Weideman met 304 km, Shaun Mare met 301 km en Soelanie Williams met 300 km.
Sarel Esterhuizen en Van Vreden Sadie het elk 63 rondtes voltooi, oftewel 253 km.

Ander Middelburgse fietsryers wat deelgeneem het, was Rina Sadie (51 rondtes), Riaan van den Berg (50), Christelle Vermaak (50), Kevin Minnie (43), Eddie Naudé (41), Mariaan Pieterse (39), Christine Wentzel (36), Gerhard Nel (29), Martin Wentzel (11), Frieda Nel (drie) en Pine Pienaar, wat 125 km afgelê het.

• Die poging was daarop gemik om geld vir die Teddy Bear Foundation in te samel.