Nog ’n Puma-senter doen ernstige kniebesering op
Veldtog begin om mediese uitgawes te dek nadat sentermaat suksesvol geopereer is.
Nog ’n Puma-senter, weer ’n ernstige kniebesering en nog reuse- mediese uitgawes.
Die Puma-senter, Nathan Jansen van Vuuren, het tydens ’n wedstryd teen die Valke vroeër vanjaar ’n ernstige kniebesering opgedoen, wat sy Cravenweek-drome verpletter het.
Die gemeenskap het saamgestaan en R230 350 is vir die HTS Middelburg-speler ingesamel.
Hy het intussen so goed met sy rehabilitasie gevorder, dat hy weer volgende jaar vir die Rooi Bulle kan uitdraf.
Nou het sy Puma-sentermaat, Blake Faber van Hoërskool Middelburg, sy knieligamente en meniskus so ernstig beseer tydens ’n oefening, dat hy ook mediese sorg en langtermyn rehabilitasie nodig het.
’n BackaBuddyveldtog is begin om die gesin te help.
Die mediese fonds het ’n groot gedeelte van die kostes gedek, maar daar is nog R100 000 nodig om die belowende senter weer op die been te kry.
Hy word tans in die Midmed-hospitaal behandel.
• Hoërskool Middelburg se rugbyhoof, Christiaan Gouws, het gevra dat, soos in die geval met Nathan, die belowende senter gehelp moet word om sy rugbyloopbaan voort te sit.
