Middelburg is bekend vir al die diere wat die dorp al op horings geneem het. Van waterbokke tot koedoes, likkewane, seekoeie, krokodille, muskeljaatkatte en bruinhiënas.

Deesdae is daar ook ’n voëlbevolking wat inwoners verstom.

Daar is soveel uile in die omgewing van Sterkfontein Gastehuis dat ’n uilpadteken deur die Steve Tshwete-munisipaliteit in Sipresstraat opgesit is, wat motoriste versoek om uit te kyk vir die grootoë.

In die nag word die aanhoudende “gehoe-hoe” veral in Kanonkop en Dennesig gehoor.
Cois Minnaar het die verrassing van sy lewe gekry toe ’n nonnetjiesuil hom besoek het.
“Daar was nie nog tyd om my kamera te gaan haal nie. Ek het sommer die selfoon gegryp om hom af te neem. Hy het omgedraai, my een skewe kyk gegee en toe weggevlieg.”

Die nonnetjiesuil het ’n opvallende wit, hartvormige gesig met klein, swart ogies.
Hulle leef graag naby mense en maak dikwels nes in ou geboue, kerktorings en skure.
Dié uile is nagtelike jagters wat hoofsaaklik knaagdiere (soos muise en rotte) en insekte vang.

• *Middelburg het oor die jare ook sy kwota snaakse voëls opgelewer, soos die flamink wat in Mineralia paradeer het en die kaalwangvalk wat grasieus oor die dorp swiep.