Middelburg Marathonklub het Saterdag weer die dorp se naam hoog gehou met 20 atlete, waaronder Dewald Koen, wat die 42.2km by die TracN4 Elandsvallei Marathon voltooi het.

’n Verdere 13 atlete het die 21.1km wedloop kafgedraf.

Koen het sy eerste 42.2km gehardloop en het sy droom verwesenlik om dit onder vier ure te doen. Sy tyd was 3:56.14.

Die klub het die afgelope paar weke aan verskeie wedlope deelgeneem om fiks genoeg te wees vir die Elands as een van die kwalifiserende wedlope vir die Comrades Marathon.

• Tydens die Sasol wedloop in Secunda het al die klublede ’n pienk strikkie gedra ter ondersteuning van een van die klublede wat tans teen kanker veg. Fransie du Toit die was die wenner van die 60+ vroue en eindig Luandrée Joubert derde by die junior vroue.

• Daarna volg die Panorama Nagwedloop in eMalahleni waar Fransie weer die 60+ afdeling wen. Dit was die sewende wedloop in ’n ry wat sy haar ouderdomsgroep gewen het. Sannie Uys het tydens dié wedloop die 50+ afdeling gewen.