HAZYVIEW – ‘n Inbreker is gister doodgeskiet toe hy ‘n bekende besigheidsman van Hazyview met ‘n skroewedraaier aangeval het.
Die feite wat gistermiddag se selfverdedigingsaksie voorafgegaan het, is kortliks aan Laevelder deur sy regsverteenwoordiger, mnr Koen Koekemoer, weergegee.
Terwyl mnr. Wikus Kotzé, eienaar van Supaquick Hazyview, gistermiddag in sy winkel werksaam was, het sy werknemers hom skielik kom roep.
“Wikus se werknemers was bekommerd toe hulle opgemerk het dat die skuur se deur oopstaan. Daar is ‘n vreemde persoon op die plaas opgemerk en hulle het Wikus gevra om ondersoek te gaan instel. Toe hy die skuur se deur verder oopstoot, is hy aangeval.”
Koekemoer het verduidelik dat Kotzé met ‘n skroewedraaier aangeval is en ‘n gestoei het gevolg. “Tydens hierdie onderonsie het ‘n skoot uit Kotzé se pistool afgegaan. Die aanvaller is gewond en is op die toneel dood.”
Die Hazyview SAPD ondersoek tans die voorval.
