Die soektog na twee dogtertjies wat deur water in die Valsrivier by Bothaville meegesleur is, het tragies geeïndig ndat hul liggame gistermiddag gevind en deur familielede uitgeken is.

Parys Gazette berig dat die soektog na die twee kinders, onderskeidelik sewe en 10 jaar oud, Dinsdag geloods is nadat hulle saam met ‘n 11-jarige meisie deur ‘n sterk rivierstroom meegesleur is.

Die 11-jarige meisie kon daarin slaag om aan ‘n boomstam vas te klou.

Polisieduikers het nadat die voorval gerapporteer is, onverpoosd na die liggame van die twee kinders gesoek. Die soek-en reddingspan is deur die Vrystaat polisie se lugvleuel ondersteun.

Die name van die dogtertjies word op versoek van die familie nie bekendgemaak nie, het polisiewoordvoerder, kapt. Loraine Earle gesê.