Vrystaatse maatskaplike werker en haar man deel trougeluk met 48 kinders

Namate die laaste dae van die maand van liefde tot ’n einde gekom het, het ’n Bloemfonteinse paartjie besluit om hulle troue op ’n besonderse manier in ’n ware gemeenskapsfees te omskep.

Bloemfontein Courant berig dat hoewel Schalk en Marinique Wentzel op 7 Februarie in die Drakensberg getroud is, het hulle geweet hulle liefdesverhaal sou nie volledig voel sonder die 48 kinders van Engo se Esperanza-, Gardenia-, Gladstone- en Carpe Diem-huise nie.

Volgens die nie-winsgewende, nie-regeringswelsynsorganisasie se webtuiste bied Engo noodsaaklike sorg en berading aan kinders, families, bejaardes, persone met gestremdhede en pasiënte in nood.

Meer as net huweliksbeloftes

Vir die paartjie het die dag oor meer as net die herhaling van hulle huweliksbeloftes gegaan. “Dit was ’n doelbewuste geleentheid om liefde te deel met die kinders wat so ’n belangrike deel van ons lewensreis vorm,” het hulle gesê. Jare lank het Marinique, ’n maatskaplike werker by die sentrums, haarself liefdevol voorgestel as ’n ‘ongetroude ma van 48 kinders’.

Dieselfde kinders was by toe Schalk haar in Mei verlede jaar met sy huweliksaansoek verras het. Dit was dus vanselfsprekend dat hulle ook deel van die groot dag wou wees. Verlede Saterdag het dié wens waar geword by Leopards and Lace in Bloemfontein, waar die paartjie weer voor die kansel gestaan het – hierdie keer met die kinders in die voorste rye. Vir baie van die kinders was dit die eerste troue wat hulle bygewoon het.

‘Ons wou hê hulle moes werklik deel wees’

“Die meisies het as strooimeisies ingestap met fyn blomkransies op hul koppe, terwyl die seuns trots as strooijonkers opgetree het.” Die kindervriendelike seremonie het die kinders die geleentheid gegee om meer uit te vind oor die betekenis van die huwelik en die beloftes wat gemaak word. “Die aanloop tot die dag was ’n besonderse reis,” het Marinique gedeel. “Die kinders het uitgesien na hul nuwe uitrustings en het soveel vrae gehad oor hoe ’n troue werk. Ons wou hê hulle moes nie net toekyk nie, maar werklik deel daarvan wees.”

Die paartjie het hulle dank uitgespreek teenoor die borge wat betrokke geraak het – van die bruid se trourok tot die fotografie. Dit het bewys dat hulle liefde nie net op dié dag gevier is nie, maar ook gedeel is.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.