Vir Alet de Ridder voel dit of 25 September 2025 homself herhaal. Die onlangse moord op ’n onbekende man in Potchefstroom se middestad is ’n pynlike herinnering aan die dag toe haar seun daar vermoor is, berig die Potchefstroom Herald.

Chris van der Wal (31) is laasjaar in die middestad vermoor toe hy ’n steekwond aan die nek opgedoen het. Op 14 April omstreeks 06:00 is die liggaam van ’n onbekende man in dieselfde area gevind. Hy het ook ’n steekwond aan sy nek gehad en was geklee in ’n groen hemp, blou broek en rooi-en-swart tekkies.

Kaptein Majang Skalkie van die Noordwes-polisie het bevestig ’n moordsaak word ondersoek. “Geen verdagtes is nog in hegtenis geneem nie en die motief vir die aanval is in hierdie stadium onbekend,” het Skalkie gesê.

De Ridder sê die onlangse moord het haar van voor af ontstel. Sy hoop steeds dat geregtigheid vir haar seun sal geskied. Volgens De Ridder is daar tot dusver min vordering in haar seun se saak en sy voel die polisie deel bitter min inligting met die familie.

Van der Wal se beursie en ID is by hom gevind. Sy selfoon en sleutels was in ’n vriend se bakkie saam met wie hy vroeër gery het. Hy het die aand voor sy dood saam met sy vriende rugby gekyk en pool gespeel voor ’n rusie uitgebreek het.

“Hulle het by GP’s ’n uitval gehad en langs die pad weer baklei. Chris het toe besluit om te loop, maar die vriend het hom later weer opgelaai,” verduidelik De Ridder. Dit is onduidelik wat daarna gebeur het. Voor sy liggaam gevind is, het CCTV-beeldmateriaal gewys hoe Van der Wal die N12 oorsteek terwyl hy sy nek vashou.

De Ridder beskryf haar seun as iemand met groot drome. “Hy het daarna uitgesien om as ’n installasie-tegnikus te kwalifiseer. Hy was baie positief oor die toekoms.”

Noordwes-polisiewoordvoerder, kolonel Adéle Myburgh, het gesê dat daar nog geen verband tussen die twee moorde gevind is nie. Die polisie doen ’n beroep op enigiemand met inligting oor enige van die twee voorvalle om die Potchefstroom-polisie te kontak by 018 299 7477/6.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.