‘n Bejaarde vrou het vandag (5 Julie) haar lewe verloor nadat ‘n verwoestende brand vier meenthuise by Heldersig-woonstelle in Noorderstraat, Parys, verswelg het, berig die Parys Gazette.

Volgens Fanie Kruger van Security Master het die brand vinnig versprei.

“Vier meenthuise is deur die brand geraak, waarvan een heeltemal uitgebrand het. ‘n Bejaarde tannie wat in haar woning vasgekeer was, het ongelukkig in die brand omgekom,” het Kruger gesê.

Ngwathe Brandweer en Nooddienste, ambulansdienste, Parys-sekuriteitsmaatskappye en ander nooddienste het hulle na die toneel gehaas om die vlamme te probeer blus en die gebied te beveilig.

Terwyl die brand gewoed het, is daar gehoor hoe verskeie gasbottels ontplof en het daar ‘n dik rookwolk in die lug gehang.

Lede van die Parys-gemeenskap het hulp verleen waar hulle kon.

“Die gemeenskap spring altyd in en staan saam wanneer daar ‘n noodsituasie is,” het Kruger gesê.

Teen 15:10 was die brand uitendelik onder beheer. Die oorsaak van die brand is tans onbekend.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.