Vroue wat na bewering voorheen by Tammy Taylor-salonne gewerk het, het vroegoggend buite die handelshof in Pretoria betoog om hulle steun aan Peet Viljoen uit te spreek.

Hulle het plakkate omhoog gehou met boodskappe soos: “Peet Viljoen deserves freedom” en “Peet Viljoen gave hundreds of women work.”

Volgens inligting wat bekom is, glo die vroue Viljoen is onskuldig.

Viljoen het verlede jaar opslae gemaak nadat hy op sosiale media onder meer gesê het daar is “geen twyfel in sy hart” dat hy ‘n rassis is en swart mense haat nie. Hy het ook swart mense as “dom” beskryf.

Tammy van der Merwe, ‘n vriendin van Mel Viljoen, sê sy het die betoging gereël.

“Ons glo in Peet se onskuld en hy het aan baie vroue werk verskaf,” het sy gesê.

Sy het bygevoeg dat die groep bewus is van Viljoen se uitlatings, maar glo dat almal vergifnis verdien.

Viljoen het die hof in ‘n Hugo Boss-sweetpak binnegegaan.

Hy het gesê hy is positief oor die dag se hofverrigtinge.

Viljoen staan tereg op 400 aanklagte van bedrog, korrupsie, vervalsing en diefstal. Hy word daarvan beskuldig dat hy munisipale eiendom in 2010 onwettig verkoop het. Sy borgtogaansoek work vandag aangehoor.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.