Swaar reënval in die Vaaldam se opvangsgebied en vinnig stygende waterinvloei het die Departement van Water en Sanitasie (DWS) genoop om sy besluit rakende die oopmaak van sluise aan te pas.

Vroeër is daar aangekondig dat die vyfde sluishek vanmiddag om 16:00 oopgetrek sou word. DWS het egter nou bevestig dat die vyfde sluis reeds sedert 14:30 oop is en dat die sesde teen 16:00 oopgetrek sal word.

Só styg vrystellings:

Die ses sluishekke is oop in ‘n poging om die huidige invloei van 2 056,50 kubieke meter per sekonde (m³/s) te hanteer.

Die Vaaldam was teen middagete op 113,54% van kapasiteit.

Verder stroomaf word uitvloeie by die Bloemhofdam dienooreenkomstig verhoog om die stygende vlakke te bestuur.

Die vrystellings het as volg gestyg:

•  09:00 – van 800 m³/s tot 1 050 m³/s
• 11:00 – 1 300 m³/s
• 13:00 – 1 550 m³/s
• 15:00 – 1 800 m³/s
• 17:00 – verwagte vrystelling van 2 000 m³/s

Damvlakke almal oor 100%

Die Bloemhofdam het op 107,30% gestaan teen middagete.

By Grootdraaidam bly een sluishek oop, met die dam op 105,71% en invloei van 141,72 m³/s.

Beide die Gariep- en Vanderkloofdamme in die Oranjerivierstelsel loop oor, en is onderskeidelik op 107,13% en 105,3%.

Inwoners gewaarsku teen oorstromings

Die DWS waarsku dat beheerste en onbeheerde vrystellings van hierdie damme kan veroorsaak dat rivierbanke oorstroom langs die Vaal- en Oranjeriviere.

Inwoners in laagliggende gebiede binne die 1-in-100-jaar vloedlyn word aangeraai om ontruim te bly en oorstroomde gebiede te vermy.