’n Tragedie het die Vaaldriehoek se veiligheidsgeledere geruk nadat ’n lid van die plaaslike Gemeenskapspolisiëringsforum (GPF) gisteraand (6 Julie) op die R42 (Barrageweg) doodgery is. Die voorval het plaasgevind tydens ’n polisie-operasie in die gebied.

Die voorval het tydens die polisie se Operasie Shanela plaasgevind, in ’n gedeelte van Barrageweg wat bekend is vir sy verskeie motorhandelaars, berig Vaalweekblad.

Die oorledene is geïdentifiseer as Dalena Willeboordse (53), wat onder haar radio-roepsein ‘A Angel DW1’ bekend was.

’n GPF-lid wat op die toneel was en anoniem wil bly, het die oomblik van die botsing beskryf: “Ons was besig om die padblokkade af te slaan toe ’n bestuurder in een van ons lede en ook ’n polisievoertuig ingejaag het. Dit was skokkend om te aanskou; ons het die hele voorval gesien.”

Vaalweekblad verneem die betrokke bestuurder is onmiddellik na die voorval in hegtenis geneem. Bewerings dat hy moontlik onder die invloed van alkohol was, word tans ondersoek. Die polisie het teen publikasietyd egter nog nie amptelike besonderhede bekend gemaak nie.

Haar skielike dood het skokgolwe deur die gemeenskap gestuur, waar sy onthou word vir haar jarelange diens en passie vir gemeenskapsveiligheid.

Lede van die polisie en die GPF kom vandag om 18:00 byeen vir ’n parade. Daarna sal hulle in ’n konvooi na die toneel vertrek vir ’n spesiale kranslegging-seremonie ter nagedagtenis aan hul kollega.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.