Drie mense, waaronder ‘n kleuter, het gisteraand gesterf in ‘n ongeluk tussen ‘n trok en voertuig by die Broodsnyersplaas T-aansluiting op die Bethalpad buite Middelburg in Mpumalanga.

Middelburg Observer berig dat, na wat verneem word, die ongeluk omstreeks 19:00 gebeur het.

Drie persone, wat die kleuter insluit, het op die toneel gesterf en drie met ernstige beserings is hospitaal toe geneem. Die toneel was teen 22:30 opgeruim.

Dit is die derde noodlottige ongeluk sedert Donderdag op die paaie in die Middelburg- en Belfastomgewing.

Donderdagmiddag het vyf mense gesterf in ‘n ongeluk op die N4 by Berg-en-Dal, net buite Belfast. ‘n Sesde persoon het ure later aan ernstige beserings beswyk.

Die verkeer het vir ure stilgestaan terwyl die toneel opgeruim is.

Gisteroggend is twee mense dood en 13 beseer in nog ‘n ongeluk op die N4, sowat 2km vanaf die Middelburgdam. ‘n Taxi het die pad verlaat en teen die skuinste afgerol.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.