Kyk: Ouers praat ná moord op narkotiseur van Mbombela
Margaret en Jacob Vorster maak hulle harte oop en verduidelik wat reeds bekend is oor die moord op Dr. Nicholas Procter.
Die skokmoord op Dr. Nicholas Procter van Mbombela is nog raaiselagtig en laat talle vrae ontstaan.
Procter was eers as vermis aangemeld toe hy nie verlede Donderdagoggend vir werk by Mediclinic in Nelspruit opgedaag het nie. Sy bakkie is by ‘n brug in die stad gevind, maar daar was geen teken van hom nie.
Die soektog het later daardie dag ‘n moordondersoek geword nadat sy liggaam – met sy hande en voete wat vasgebind was – in ‘n woonstel van die Green Valley Estate gevind is.
Bheki Ndlovu (38), Nkateko Tshidzumba (24) en Siyabonga Kekana (20) is Maandag in Protea Glen, Gauteng, ondervra in verband met die moord.
Formele klagte van moord en roof is teen hulle aanhangig gemaak waarna hulle Dinsdag in die Nelspruit-landdroshof verskyn het. Die saak is tot 14 Februarie uitgestel vir ‘n formele borgtogaansoek. Volgens die polisie word nog ‘n man intussen gesoek in verband met die moord.
Izak du Plessis van Nuuspod het met Procter se ma en stiefpa, Margaret en Jacob Vorster, gepraat oor die dag se gebeure.
Sy ma noem dat hy baie geliefd was onder sy pasiënte en dat hy veral goed gewerk het met kinders oor sy sagte persoonlikheid.
Hulle verduidelik ook die verloop van gebeure en die besonderhede wat reeds bekend is oor die moord. Hulle noem dat Procter voorheen ontvoer en gemartel is vir 19 ure in ‘n hut in Soweto.
Kyk die volle onderhoud hier:
Read original story on www.citizen.co.za