’n Pa van George is in rou nadat sy enigste dogter Sharoline Daters (26) op 9 Maart vermoor is, na bewering deur die ma van haar neef se kinders.

“Ek kan nie lank praat nie. My hart is gebreek, en ek huil vinnig,” het Jacob Daters (65) hierdie week tydens ‘n telefoniese onderhoud aan George Herald gesê.

Hy sê dat sy dogter Saterdag 22 Maart langs haar ma in Beaufort-Wes begrawe word ‘dat hulle bymekaar kan wees’.

Jacob onthou sy dogter as ‘n dierbare mens met die mooiste glimlag wat altyd bereid was om ander te help.

“Sy was ‘n liewe mens en het so mooi na my gekyk. Ek kan nie verstaan dat iemand haar lewe sou wou neem nie. Hier staan ek nou alleen en kosmaak.”

Jong vrou vir moord gearresteer

Volgens sers. Chris Spies, Suid-Kaapse polisiewoordvoerder, het Conville-polisie in George ‘n moorddossier geopen ná Sharoline se dood in Proteapark.

“Volgens voorlopige inligting het die slagoffer en ‘n ander vrou ‘n argument by die slagoffer se woning gehad. Sy het ‘n steekwond aan die bors opgedoen en is na die hospitaal geneem waar sy later deur mediese personeel dood verklaar is,” sê Spies.

Die verdagte, Micaela Smit (24), is later op aanklag van moord in hegtenis geneem.

Smit het reeds haar eerste hofverskyning gemaak en is op borg vrygelaat.

Volgens gerugte is Smit die voormalige meisie van Daters se neef, en het hulle twee kinders saam.

Op die aand van die voorval was Daters saam met haar neef toe daar glo ‘n bakleiery tussen hom en Smit oor die kinders ontstaan het.

“Sharoline was seker maar net op die verkeerde plek op die verkeerde tyd,” het ‘n familielid uit die Kaap gesê.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.