Kort nadat ‘n Gqeberha vrou in haar huis vermoor is op Vrouedag, het die polisie ’n 29-jarige verdagte in die sentrale deel van die stad gearresteer.

Marolien Schmidt (40) is Woensdag in die vroeë oggendure in haar huis vermoor, vermoedelik nadat sy op ‘n inbreker afgekom het.

Schmidt se bure het haar te hulp gesnel nadat hulle haar hoor skree en glas hoor breek het. Hulle het haar omstreeks 01:40 met veelvuldige steekwonde op die vloer van haar huis gevind. Sy is na die hospitaal gehaas, maar het aan haar beserings beswyk

Polisiewoordvoerder kapt. Sandra Janse van Rensburg sê speurders van die Humewood-polisiestasie het onverpoos gewerk om die verdagte vas te trek. Hy is Donderdag gearresteer.

Schmidt was ‘n fisoterapeut van beroep en het bekend gestaan as The Pink Physio.