’n Voormalige veekoper van die Vaaldriehoek, wat ‘n jong Vrystaatse boer in ‘n lokval gelei en vermoor het, het aansoek gedoen om op borgtog vrygelaat te word hangende sy vonnisoplegging.

Boer na afgeleë gebied gelok

Jaco Botha (45) is aan die einde van Maart in die Hooggeregshof in Pretoria skuldig bevind aan die moord op Christian van Tonder (29), ’n boer van Lindley in die Vrystaat. Van Tonder is doodgeskiet en sy liggaam is in sy bakkie gevind in November 2021 in die Barrage-omgewing in Gauteng, berig Vaalweekblad.

Die hof het bevind die moord hou verband met ’n transaksie waarin Van Tonder sowat 30 beeste aan Botha sou verkoop vir bykans R300 000. Volgens getuienis is Van Tonder na ’n afgeleë gebied gelok onder die voorwendsel dat die betaling daar afgehandel sou word.

Vertragings en gesondheidskwellings

Botha is in Augustus 2023, bykans twee jaar ná die moord, in hegtenis geneem.

Tydens die jongste hofverskyning kon sy poging om borgtog te verkry nie voortgaan nie. Die staat het bykomende eedsverklarings ingedien wat Botha se nuwe regspan eers moet bestudeer. Die saak is gevolglik tot Junie uitgestel.

Buiten die vertraging het dit ook aan die lig gekom dat Botha gesondheidsprobleme in aanhouding ervaar. Die hof het gelas dat die Departement van Korrektiewe Dienste dringend mediese behandeling aan hom moet verskaf.

Vertragings en gesondheidskwellings

Botha is voor sy inhegtenisneming vir die moord reeds in ’n afsonderlike saak van veediefstal skuldig bevind.

Vonnisoplegging word later vanjaar verwag sodra die huidige borgtogaansoek afgehandel is.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.