I-ANC ayimufuni uSomlomo we-IFP e-Nquthu

Inkatha Freedom Party e-Nquthu ithi amakhansela e-African National Congress (ANC) nawe Nationl Freedom Party (NFP) awazimisele ngokuqhubeka nemihlangano yokuthuthukisa imiphakathi yase Nquthu emkhandlwini. Kanti kuthiwa isimithathu imihlangano kaSomlomo ukhansela Thokozani Ndlovu eyisipesheli edutshwe amalunga kaKhongolose.

 
NgoMsombuluko emhlanganweni obuhanjelwe nguCOGTA ehambisana namaKhosi endawo, uMolefe no Mazibuko ukuzothamela umhlangano kaSomlomo uSodolobha kanye namakhansela akhe abazange babe ingxenye yalomhlangano. Kuthiwa ukhongolose ubucabanga ukuthi kugcotshwa iziko le-IFP njengoba bekuculwa izingoma zepolitiki kukhona namadoda abephethe izibhamu ezinkulu kanye nabalandeli beNkatha eCouncil Chamber.

 
UKhansela Sipho Nyamane onguSihlalo wekhokhasi ye IFP uthi umhlangano ubambezelekile njengoba bebelinde ubuholi be NFP ne ANC, nokugcine umhlangano uqala ngaphandle kwabo. “I-ANC ayilubhadanga nhlobo sagcina siqhubeke nobe NFP obufike nabo ngemuva kwesikhathi,”kubika uKhansela. Uthi bayajabula kakhulu noma ukhongolose ubungekho “izinto ziyaqhubeka futhi zizophasiswa izidingo zomphakathi.”

 
UKhansela Nyamane uthi abaziqondi izizathu zokuthi uKhongolose ungayihambeli imihlangano kaSomlomo uthi “asazi baqondeni ngalokho.” Akukona okokuqala ukuba i-ANC ingahambeli imihlangano kaSomlomo kuthiwa umhlangano wokuqala owabizwa nguSomlomo uNdlovu amakhansela kaKhongolose anqaba ukuwuthamela nokwathi ngayo inyanga efanayo kaOctober okwabe kubizwe ngayo umhlangano baphinda esifanayo kwadingeka ukuba uphindwe uhlehliswe. Lomkhuba kuthiwa noSodolobha, u-Emily Molefe, uyawuvuna emakhanseleni akhe.

 
Kuzokhumbuleka ukuthi uNdlovu usanda kuqokwa njengoSomlomo womkhandlu ezinyangeni azithi azibe mbili ezendlule, lapho wayeqophisana no Fikile Khumalo ongu PR Councillor we ANC. UNdlovu wawina ngamavoti angu 18, elilodwa lalibavuna bobabili kanti amathathu kungaka khongolose.

Ongu whip emkhandlwini, ukhansela Sizakele Horseman, uphika uyagelekeqela ukuthi abayihlali imihlangano kaSomlomo womkhandlu. Uthi sebehlulekile nguSomlomo ehlehlisa imihlangano sebe khona. Uqhube wathi ngeke bayibalekele bona imihlangano yomkhandlu wabo ngoba “yithi esiwuphethe,” imizuzu emibili uthi ingamahora kubona “yingakho kuthiwa siyabaleka ngoba vele asigculisekile ngalo Somlomo, uma esahlulwa imihlangano eyisipesheli uzoqhubeka kanjani negcwele?” kusho uHorseman.

 
Ukhansela Nyamane yena uthi “ukhongolose wenza lokhu ngoba ungafuni ukuphathwa.” Uthi bona njenge qembu le IFP abakaze badube imihlangano kusaphethe uSomlomo kaANC. Uqhube wathi kuyabadumaza ukuthi uSodolobha uyena ogqugquzela lomkhuba esikhundleni sokuthi akhuze. Uthi “lesenzo simisa intuthuko emphakathini ngoba kuningi okumele ngabe kuyaphasiswa.”

 
UNyamane ubike ukuthi kunama-(Policy) omkhandlu ayehlule uSomlomo omdala namanje angakaphasiswa, kanye nemali engu-R8 000 000 kagesi ka wadi 03, 10 no 13 engaphasiswa ngenxa yokungahlali komhlangano nokungadala ukuthi lemali ibuyele emuva kwa-COGTA umphakathi usale ungenzelwa izidingo.” Phakathi kwezinye izinto ebekumele zidingidwe kulemihlangano ukufakelwa kwetiyela nokulungisa imigwaqo elokishini laseNquthu. Kube ukuphasiswa kwabaqaphi baka Somlomo kanye neSekela lika Meya.

Bese kuba udaba lwamakhansela ka ANC okuthiwa axoshisa umsebenzi womkhandlu owalimaza imoto yomkhandlu behamba bonke bedle ‘amanzi amponjwana’.Emhlanganweni wangoMsombuluko i-NFP iphakamise ukuba kukhulunywe ngezidingo zomphakathi nje kuphela kwaphethwa ngokuba uSomlomo aphinde ameme omunye umhlangano lapho kuzolungiswa khona udaba lonogada.

UNyamane uphethe ngokuthi “i-ANC ayiwucabangeli umphakathi wase Nquthu ngoba abafuni ukwamukela ukuphathwa. Uqhube wathi uSomlomo ungowethu sonke futhi i-IFP yavuma ukuthi baphathe umkhandlu, azange sidube imihlangano.”

 
Okubuye kwavela, amahebezi okuthi uKhongolose waseNquthu kungathi uhlukene phakathi njengoba kukhona abafuna ukuqumba phansi uSodolobha ukuze kungene uNyamane ahole umkhandlu “ngoba ufundile.” Kuthiwa kunamakhansela afaka isicelo sokuba ihhovisi lika MEC, Nomsa Dube, lingenelele ekusebenzeni komkhandlu ngenhloso yokuveza uSodolobha ‘njengesehluleki.’

 
UNyamane uthi lokho kufana nobuphukuphuku, kubonisa ukuthi abafundisekile ngoba u-(administrator) akakwazi ukungenelela, abasebenzi bomkhandlu basenza kahle umsebenzi wabo.