Die Parys-tak van Solidariteit Helpende Hand het vandeesweek ‘n spesiale geskenkpak aan Marissa Strauss, een van die toegewyde onderwysers van Primêre Skool Parys oorhandig, as blyk van waardering vir die belangrike rol wat sy vervul as direkte skakel met die tak waar daar nood by leerders sou wees.

Die gebaar kom tydens Kinderbeskermings-week, wat van 29 Mei tot 5 Junie plaasvind. ‘n Week wat daarop fokus om bewustheid te skep van die regte en veiligheid van kinders, en om gemeenskappe aan te moedig om aktief betrokke te raak by die beskerming en ondersteuning van die jeug.

“Die Parys-tak is dankbaar vir elke opvoeder wat daagliks ‘n verskil maak in kinders se lewens, en sien hierdie week as ‘n gepaste geleentheid om erkenning te gee aan hul waardevolle bydrae,” sê takvoorsitter, Matty Last.