Moeg gesukkel met kosmaak as die krag sommer net so sonder waarskuwing afgaan? Dit is iets wat Parysenaars beslis mee kan assosieer veral nou gedurende die wintermaande wanneer dele van die dorp eenvoudig deur die munisipaliteit afgeskakel word om oorlading van die kragnetwerk te voorkom.

In 2008 het Sarah Collins met n briljante plan vorendag gekom, geïnspireer deur haar kinderherinneringe van haar ouma wat kussings gebruik het om kos warm te hou.  Sy het die uitvindsel die Wonderbag gedoop – ‘n trots Suid-Afrikaanse uitvindsel gebore as oplossing juis vir die land se energietekort en knaende beurtkrag.

Die spesiale sak werk op die beginsel van ‘n stadige kookmetode met die lap van die sak wat hitte behou. ‘n Omgewingsvriendelike en koste-effektiewe oplossing vir kook sonder krag.

Gevolglik kan jy kos wat wat reeds by kookpunt was, maar wat jy nie kon klaarkook nie weens beurtkrag, laat aanhou kook in die materiaalsak gevul met termiese isolasie. Die kos kan vir tot 8 uur lank ‘kook’ in die Wonderbag sonder dat bykomende hitte of brandstof nodig is.